माओवादीमा विवाद चुलियो


YYY
उजिर मगर, काठमाडौं, भदौ १७ -एकीकृत माओवादी उपाध्यक्ष मोहन वैद्य पक्षले शुक्रबार पार्टी स्थायी समिति बैठक बहिस्कार गरेको छ। लडाकुका हतियार राखिएका कन्टेनरको चाबी सेना समायोजन विशेष समितिलाई बुझाइएको विरोधमा वैद्य पक्ष सडकमा उत्रिएपछि त्यसबारे छलफल गर्न शुक्रबार बिहान डाकिएको बैठकमा उनीहरू अनुपस्थित भएका हुन्।

बैठकमा उपाध्यक्षद्वय वैद्य र नारायणकाजी श्रेष्ठ, महासचिव रामबहादुर थापा, सचिव सिपी गजुरेल, स्थायी समिति सदस्यहरू देव गुरुङ र नेत्रविक्रम चन्द गएनन्। १६ सदस्यीय स्थायी समितिमा कृष्णबहादुर महरा चीन भ्रमणमा रहेकाले अनुपस्थित रहे। उनी पछिल्लो समय दाहाल निकट मानिन्छन्। सम्बन्धित पक्ष नै नआएपछि औपचारिक बैठक हुन नसकेपछि पार्टी मुख्यालय पेरिसडाँडामा उपस्थित बहुमत स्थायी समिति सदस्यबाट सुझाव लिएर दाहालले विज्ञप्ति जारी गरेका थिए। उनले शिविरमा हतियार थन्क्याइएका कन्टेनरका चाबी बुझाइएको विरोधमा उपाध्यक्ष वैद्यको अभिव्यक्तिबाट कार्यकर्तालाई उत्तेजित नबन्न विज्ञप्तिमा अपिल गरेका छन्।

वैद्यको विज्ञप्तिबाट स्तब्ध भएको भन्दै दाहालले भनेका छन्, 'किरणले भदौ १५ गते २०६८ का दिन प्रेस विज्ञप्ति जारी गर्दै विशेष समिति निर्णय पार्टीको निर्णयविपरीत भन्दै सार्वजनिक रूपमा वक्तव्य प्रकाशित गरेको कुराले पार्टी स्तब्ध भएको छ।''बृहत शान्ति सम्झौता, अन्तरिम संविधान, विभिन्न समयमा भएका सहमति-समझदारी र छलफलका आधारमा सम्मानजनक सेना समायोजन, संविधान लेखन प्रक्रियामा माओवादीको सक्रिय पहल रहेको कुरा प्रस्टै रहेको' दाहालले उल्लेख गरेका छन्। शुक्रबार अध्यक्ष दाहालसहित उपाध्यक्ष तथा प्रधानमन्त्री बाबुराम भट्टराई, अमिक शेरचन, लीलामणि पोखरेल, गिरिराजमणि पोखरेल, टोपबहादुर रायमाझी, वर्षमान पुन, दीनानाथ शर्मालगायत बैठकका लागि पेरिसडाँडा पुगेका थिए।

चाबी बुझाउने निर्णय आत्माघाती भन्दै बिहीबार वैद्यले विज्ञप्तिमार्फत विरोध जनाएका थिए। वैद्य पक्षले शुक्रबार सांकेतिक विरोधमा देशभर चक्काजाम र मसाल जुलुस प्रदर्शन गरेका छन्। दाहालले चाबी बुझाउने निर्णय पार्टी केन्द्रीय र स्थायी समितिको निर्णयअनुसार भएको बताएका छन्। वैद्य पक्षका चन्दले बैठकबारे जानकारी नै नपाएकाले अनुपस्थित रहेको बताए। 'महासचिव बादलजीले आज बैठक नबसौं भोलि बसौं भनेर अध्यक्षसँग अनुरोध गरेपछि भोलि (शनिबार) बिहान बस्ने भनेका हौं,' प्रवक्ता शर्माले सञ्चारकर्मीसँग भने। चन्दले भने बैठकबारे आफूलाई कुनै जानकारी नभएको जनाए।

दाहालको विज्ञप्ति सार्वजनिक भएपछि चन्दले तत्कालै 'जनसञ्चार अभियान' कार्यक्रम आयोजना गरी 'बैठकबारे नेतृत्वले झुठ बोलेको' आरोप लगाएका थिए। 'चाबी बुझाउने निर्णय गर्दा सैन्य इन्चार्जसमेत रहेका महासचिव बादल, स्टाफ कुलबहादुर केसीसमेतलाई थाहा दिइएन, पार्टीको अघिल्लो बैठकको निर्णयलाई गलत अर्थ लगाइएको छ,' चन्दले कार्यक्रममा भने।

गत ८ गतेको स्थायी समिति बैठकले पाँचबुँदे प्रस्ताव एवं प्रतिबद्धता सर्वसम्मत रूपमा सार्वजनिक गरेको औंल्याउँदै दाहालले विज्ञप्तिमा भनेका छन्, 'माओवादी नेतृत्वमा सरकार गठनलगत्तै लडाकु हातहतियार र कन्टेनर मूर्त रूपमा विशेष समितिलाई हस्तान्तरण गर्ने सर्वसम्मत निर्णय भएको हो।' 'भट्टराईको नेतृत्वमा सरकार गठन भइसकेपछि नेपाली जनतासामु प्रकट गरिएका प्रतिबद्धताहरूलाई सम्मानका साथ जिम्मेवार पार्टीको दायित्व भएकाले चाभी बुझाउनु पार्टी नीतिविपरीत नभएको विज्ञप्तिमा उल्लेख गरेका छन्।
'माओवादी सेनाका लडाकु, हतियार र कन्टेनरलाई मूर्त रूपमा विशेष समिति मातहत ल्याउन विशेष समिति मातहतका सम्बन्धित शिविररूमा रहेका अनुगमन टोलीलाई २०६८ भाद्र १५ गते हस्तान्तरण गर्ने' भनी गरिएको निर्णय पार्टी निर्णयविपरीत नभएको तथ्य स्पष्ट नै छ', विज्ञप्तिमा उल्लेख छ।

असार १० देखि साउन ९ गतेसम्म बसेको केन्द्रीय समिति बैठकले शान्ति प्रक्रिया तथा संविधान निर्माण प्रक्रियालाई तदारुकताका साथ अगाडि बढाउनेबारे गरेको सर्वसम्मत निर्णयको परिधिभित्र रहेर चाबी बुझाइएको दाहालले विज्ञप्तिमा प्रस्टीकरण दिएका छन्।

वैद्य समूहले चाबी बुझाउने निर्णयविरुद्ध बिहान राजधानीका केही ठाउँमा चक्काजाम गरे। साँझ केही ठाउँमा मसाल जुलुस प्रदर्शन गरिएको छ। चाबी बुझाउने कार्य माओवादीको मात्रै नभई राष्ट्रसँगै जोडिएकाले सांकेतिक रूपमा चक्काजाम र मसाल जुलुस प्रदर्शन गरिएको चन्दले बताए।
प्रधानमन्त्री भट्टराई पूर्वप्रधानमन्त्री भेट्दै

प्रधानमन्त्री बाबुराम भट्टराईले पूर्वप्रधानमन्त्री, पार्टी सभापति, अध्यक्षहरूसँगको भेटघाट थालेका छन्। भट्टराईले दलका अध्यक्ष, सभापति तथा २०४७ यताका प्रधानमन्त्रीलाई भेटघाट गर्ने कार्यक्रम तय गरेका छन्।
प्रधानमन्त्री निकट पत्रकार मनऋषि धितालका अनुसार शुक्रबार साँझ एमालेमा वरिष्ठ नेता तथा पूर्वप्रधानमन्त्री माधवकुमार नेपालसँग भटघाट गरे। नेपाल निवास कोटेश्वर गएर भट्टराईले भेटघाट गरेका थिए। - नागरिक

भर्खरै थपिएका पोष्टहरू

पछिल्ला समाचारहरु

प्रवास खबर

स्थानिय समाचार

[सुन्दरसंसार-मनोरञ्जनात्मक वेभपत्रिका,आज तपाइँले हेर्नुभयो?]